Në kuadër të takimeve periodike që zhvillohen çdo të mërkurë të parë të muajit, u mbajt edhe këtë javë takimi i radhës mes Këshillit Studentor, Rektorit dhe përfaqësuesve të Drejtorisë së Marrëdhënieve me Publikun dhe Studentët. Ky takim shërben si një platformë e rëndësishme komunikimi dhe bashkëpunimi institucional, ku trajtohen çështje me interes të drejtpërdrejtë për komunitetin studentor.
Gjatë diskutimeve u trajtuan disa tema kryesore:
Karta Studentore – U theksua nevoja për zgjerimin e numrit të studentëve të pajisur me kartën e studentit, duke e konsideruar atë si një instrument të rëndësishëm për përfitimin e shërbimeve dhe lehtësirave të ndryshme.
Pasurimi i fondit të bibliotekës – U diskutua për shtimin e titujve të rinj dhe bashkëkohorë, me qëllim përmirësimin e cilësisë së studimit dhe mbështetjen e nevojave akademike të studentëve.
Përgatitjet për zgjedhjet në Këshillin Studentor – U adresuan hapat organizativë për zhvillimin e zgjedhjeve të reja, duke e konsideruar këtë proces thelbësor për garantimin e përfaqësimit dhe përfshirjes aktive të studentëve në jetën universitare.
Takime të tilla të rregullta kontribuojnë në forcimin e dialogut mes studentëve dhe strukturave drejtuese të universitetit, duke garantuar që zëri i studentëve të dëgjohet dhe të reflektohet në vendimmarrje.
