Presidenti i Argjentinës ka kërkuar dorëheqjen e Ministrit të Shëndetësisë Gonzalez Garcia, thanë dy burime në presidencë të Premten, më 19 shkurt.

Kërkesa e Presidentit erdhi pas zbulimit të skandalit, ku ministri u propozonte miqve të vet që të vaksinoheshin jashtë radhës.

Dy burimet në zyrën e Presidentit konfirmuan për Reuters se presidenti kishte kërkuar dorëheqjen e Garcia.

“Presidenti i tregoi shefit të shtabit që ministrit të shëndetësisë duhet t’i kërkohet të japë dorëheqjen,” tha një nga burimet.

“Unë po jap dorëheqjen nga posti im në Ministrinë e Shëndetësisë pas kërkesës suaj të qartë, ” tha Gonzalez Garcia në një letër të dorëheqjes drejtuar kreut të shtetit.

Ai do të zëvendësohet nga Dr. Carla Witsotti, e njohur në Argjentinë, ndërsa ndërmori të negocionte furnizimin me vaksinën ruse për koronavirusin.

Ishte gazetari i famshëm 71-vjeçar Horacio Verbicki, një nga të parët, i cili zbuloi skandalin duke konfirmuar se shkoi të vaksinohej jashtë radhës pas nxitjes së ministrit, mikut të tij të vjetër.

“I telefonova Gonzalez Garcia dhe ai më tha të shkoja në Spitalin Posada,” rrëfeu Z. Verbicki. Media raportoi për disa raste të tjera të politikanëve dhe personaliteteve të cilët gjithashtu shkuan dhe u vaksinuan.