Pas dorëheqjes së Suad Licit si administrator i Vllaznisë, Këshilli Mbikëqyrës ka diskutuar për administratorin e ri të KF Vllaznia ku në një kohë shumë të shkurtër Benjamin Naku është emëruar administrator i ri i KF Vllaznia. Naku njihet për karrierën e tij si sportist, pedagog dhe drejtues i Departamentit të Edukimit Fizik në UNISHK. Këtë e ka bërë të ditur vetë klubi Vllaznia përmes një postimi në “Facebook”.
POSTIMI I PLOTË
KF Vllaznia bën të ditur se administratori i klubit, z. Suad Lici, ka kërkuar dorëheqjen nga ky pozicion për arsye të angazhimeve të tij personale.
Këshilli Mbikëqyrës është njohur me kërkesën e z. Lici, e ka shqyrtuar dhe ka vendosur pranimin e saj. Në vazhdim, Këshilli Mbikëqyrës ka diskutuar për administratorin e ri të KF Vllaznia dhe ka vendosur emërimin e z. Benjamin Naku në këtë pozicion.
Z. Naku njihet për karrierën e suksesshme si sportist, por edhe si pedagog dhe drejtues i Departamentit të Edukimit Fizik e Sporteve, në Fakultetin e Shkencave të Edukimit pranë Universitetit të Shkodrës “Luigj Gurakuqi”.
Dëshirojmë të shprehim falenderimin tonë për punën e bërë nga z. Lici. Ai do të vazhdojë të japë kontributin e tij pranë KF Vllaznia, tashmë në pozicionin e Kordinatorit Teknik.
Njëkohësisht i urojmë z. Benjamin Naku suksese në detyrën e re.
