Vllaznia në volejboll për meshkuj ka arritur një fitore të rëndësishme duke mundur 3-1 ekipin e Tiranës në ndeshjen e luajtur në pallatin e sportit “Qazim Dervishi” në qytetin e Shkodrës.
Shkodranët kanë dominuar këtë takim duke arritur këtë fitore që i mban kuqeblutë në vendin e katërt, brenda objektivave. Trajneri i Vllaznisë Ermal Kraja thotë se me këtë fitore ndaj një ekipi si Tirana është kaluar kriza momentale.
Volejbollistët e Vllaznisë humbën setin e dytë duke treguar një lloj luhatje në momente të ndryshme gjë e cila duhet riparuar thotë tekniku Kraja.
Trajneri Kraja vazhdon që të bëjë thirrje që në skuadrën e tij duhen edhe lojtarë të huaj për ta përforcuar ekipin për të pretenduar diçka më shumë.
Volejbollistët e Vllaznisë kanë si objektiv qëndrimin mes katër ekipeve më të mira për të marrë pjesë në fazën Play Off ku diskutohet titulli kampion.
