Situata hidrologjike në territorin e Bashkisë Shkodër paraqitet e qëndrueshme dhe nën monitorim të vazhdueshëm nga strukturat përgjegjëse. Sipas të dhënave zyrtare, nivelet e ujit janë nën kuotat kritike dhe nuk ka banesa me prezencë uji në brendësi të tyre.
Sipërfaqja totale e tokës bujqësore me prani uji vlerësohet rreth 945 hektarë, kryesisht në Njësinë Administrative Ana e Malit me rreth 600 hektarë, Velipojë 195 hektarë, Dajç 120 hektarë dhe Bërdicë rreth 30 hektarë. Prania e ujit është e kufizuar në sipërfaqe të hapura bujqësore.
Në zonën e Obotit, uji është i pranishëm vetëm në oborre dhe nuk ka depërtuar në banesa. Qarkullimi është i garantuar përmes mjeteve të Ushtrisë, ndërsa kalimi me automjete të zakonshme mbetet i bllokuar për shkak të rritjes së nivelit të ujit në rrugë.
Situata e lumenjve paraqitet e kontrolluar. Niveli i Bunës në Dajç është 6.64 metra, ndërsa në Urën e Vjetër të Bunës arrin në 8.70 metra, rreth 50 centimetra nën kuotën kritike. Në Urën e Bahçallëkut, lumi Drin shënon kuotën 7.70 metra, rreth 2.30 metra nën nivelin e rrezikut.
Hidrovoret po punojnë me kapacitet të plotë dhe pa ndërprerje, duke mbajtur nivelet e ujit në kuota të sigurta. Furnizimi me energji elektrike është normal dhe argjinaturat, kanalet kulluese si dhe shkarkuesat e Digës së Rezervuarit të Shkodrës nuk paraqesin problematika apo rrezik për përmbytje.
Autoritetet konfirmojnë se monitorimi në terren vijon pa ndërprerje dhe situata mbetet nën kontroll.
