Pak javë pasi komisioni i jashtëm dhe sekretariati teknik që do të kryejnë vettingun në policinë e shtetit nisën nga puna me zyra tek ish garda e republikës, ministri i brendshëm Sandër Lleshaj propozon ndryshime ligjore.
Me argumentin se kosto financiare ka bllokuar për mbi 8 muaj nisjen e vettingut në polici dhe pamundësisë për kapjen e afateve kohore Lleshaj shprehet se veç 30 gradave të lartë me përparësi duhet të kalojë në vetting edhe struktura e SHÇBA-së.
Me kalimin e agjentëve të shërbimit të brendshëm dhe ankesave në vetting sipas relacionit të siguruar nga reporttv, ata do të shërbejnë më pas për të kryer vettingun e fazës së dytë dhe të tretë që prej 12 mijë uniforma blu.
Në sitën e vettingut në rradhët e policisë sipas ligjit 12/2018 kalojnë drejtuesit e lartë e më pas duke zbritur deri tek oficeri më i thjeshtë, por e gjitha kjo e ezauruar në 2 vite.
Këto afate kohore kur vettingu në polici ka hyrë në fuqi në 2018 duhet të kapen deri në 2020 çka realisht është e pamundur dhe ka sjell nevojën e ndryshimeve në ligj.
Një tjetër detaj sipas relacionit ështe edhe kosto financiare e cila përllogaritet në 3 milion dollarë për të kaluar në vetting mbi 12 mijë efektivë.
‘’Sipas parashikimeve procesi i vlerësimit do të kushtojë rreth 300 milionë lekë ose rreth 3 milionë dollarë.
Në këto kushte, duke pasur parasysh se vetë elementi financiar ishte një nga arsyet që solli vonesa në implementimin e procesit, Ministria e Brendshme, pas një analize të thellë dhe shumëplanëshe propozon një mekanizëm të ri për vlerësimin,
i cili mund të arrijë po të njëjtat objektiva, pra të pavarësisë, paanshmërisë dhe objektivitetit të procesit, me më pak kosto për buxhetin e shtetit’’thuhet në këtë dokument.
Por si parashikohet vetingu pas ndryshimeve të propozuara nga Lleshaj?
Ai propozon që për gradat e larta të mos ketë ndryshim nga ligji i mëparshëm. Drejtori i Përgjithshëm, zëvendës drejtori, drejtorët dhe shefat e sektorëve e kalonin vlerësimin në fazën e parë.
Vlerësimi i fazës së parë kryhet nga një Komision i Jashtëm me 15 anëtarë, i asistuar nga një sekretariat teknik me po 15 anëtarë.
Ndryshimi i dytë thelbësor qëndron në faktin se propozohet që të jetë SHÇBA-ja ajo që do të kryejë vlerësimin e të gjithë punonjësve të Policisë së Shtetit dhe Gardës së Republikës në fazën e dytë dhe të tretë, pra punonjësit e nivelit të mesëm drejtues dhe atyre të nivelit bazë.
Kjo zgjidhje ka disa avantazhe të dukshme.
Së pari, ka një impakt të ndjeshëm mbi buxhetin e parashikuar. Ngarkimi i SHÇBA-së me vlerësimin e punonjësve në fazën e dytë dhe të tretë, pra rreth 12 000 punonjës, i kursen buxhetit të shtetit rreth 260 milionë lekë duke minimizuar kostot shtesë.
