Lideri demokrat Lulzim Basha ka uruar Partinë Demokratike në ditëlindjen e saj të 29 nga themelimi. “Jemi partia e shpresës”, thotë kryedemokrati në një urim të shpërndarë në rrjetin social Facebook, teksa e quan këtë, arritjen më të madhe të partisë nga momenti i krijimit.

“Liri – Demokraci! 29 vjet më parë këto 2 fjalë ishin oksigjeni që rikthyen në jetë një komb, i cili ra në errësirën e diktaturës më të egër komuniste për gati 5 dekada. Liri – Demokraci është guri i themelit që ngriti në këmbë shtëpinë e demokratëve, shtëpinë e shqiptarëve që e donin Shqipërinë si gjithë Europa.

Për 29 vite, Partia Demokratike ia ka dalë të jetë partia e shpresës. Kjo është arritja jonë më e madhe në këto 29 vjet. Sot shqiptarët i kanë sytë nga ne për të finalizuar misionin për të cilin u themelua Partia Demokratike si garante e lirisë, e demokracisë dhe e mirëqenies së qytetarëve shqiptarë.

Shqiptarët meritojnë të votojnë të lirë për qeverisjen e tyre, ata meritojnë një qeveri që punon për mirëqenien e tyre, që respekton fjalën e lirë dhe të drejtën e pronës, një qeveri që bën më të mirën për të siguruar të ardhmen e qytetarëve të saj! Fëmijët tanë meritojnë të rriten si shqiptarë europianë në Shqipërinë tonë të bukur, Shqipërinë si gjithë Europa! Dhe së bashku do ta bëjmë realitet!

Gëzuar 29 vjetorin e themelimit të Partisë Demokratike! Zoti e bekoftë Shqipërinë!”, shkruan Basha.

Partia Demokratike anuloi aktivitetet e planifikuara për 11 dhjetorin, ditën e themelimit të partisë. Të gjitha fondet e përcaktuara për këto aktivitete se bashku me kontribute të anëtarëve dhe simpatizantëve të saj do të shkojnë në ndihmë të personave të goditur nga tërmeti i 26 Nëntorit.

Artikulli paraprakMANASTIRLIU NË LAÇ: GARANTOJMË SHËRBIMIN E URGJENCËS, DO TË RINDËRTOJMË SPITALIN E LAÇIT
Artikulli tjetërMINISTRI I JASHTËM ITALIAN: PAS VLERËSIMIT TË DËMEVE JU NDIHMOJMË ME RINDËRTIMIN