Gjykata e Durrësit ka caktuar burg pa afat për të birin Alban dhe bashkëshorten e ish-kryekomunarit, Bardhe Djaloshi.
Alban Djaloshi ka folur sot në Gjykatën e Durrësit për vrasjen e babait të tij, Mirash Djaloshi, i cili u gjet i vdekur në muajin mars në oborrin e shtëpisë. Gjithashtu, Gjykata caktoi 45 ditë burg për djalin tjetër 16-vjeçar. Mirëpo, ndërkohë që për vrasjen akuzohen që të tre, ka qenë Albani ai që ka marrë autorësinë në gjyq. Ai tha se vrasjen e kreu i vetëm pak pas mesnate dhe më pas shkoi të flinte. “Unë isha në gjumë atë ditë dhe ishte ora 1 e natës. Babai nuk kishte ardhur ende në shtëpi. Rreth orës 1 e ca dëgjova një kollitje jashtë shtëpisë dhe dola në oborr të shihja. Pashë babanë që ishte i dehur. Ai kur më pa nisi të më shante dhe mu vërsul. Iu kujtua një ngjarje e para disa viteve kur unë u arrestova për një vjedhje të shkollës. Hajde këtu ti hajdut m…”, më thirri babai dhe më ndoqi me një sfurk që të më godiste. Unë vrapova drejt stallës së lopës dhe aty gjeta një hu dhe e godita dy herë në kokë. Ai ra në tokë dhe më duket se kishte vdekur. Më pas u ktheva të flija. Në mëngjes më zgjon nëna dhe më thotë se babai nuk kishte ardhur ende në shtëpi. Unë e dija se mund ta kisha vrarë, ndaj nuk fola. Lajmërova xhaxhanë dhe e gjetëm aty ku e kisha lënë. Kisha frikë ta pranoja që në fillim krimin”.
/ Star Plus TV /
