Oratori “Don Bosko” në Shkodër përmbylli lojërat verore me fëmijët e qytetit të Shkodrës. Për katër javë me radhë 825 fëmijë dhe 222 animatorë morën pjesë në aktivitetet edukuese, argëtuese dhe sportive të Lojërave Verore 2022.
Pas katër javësh në mjediset e Oratorit u zhvillua nata finale me 6 ekipeve të përbëra nga skuadrat e Massimo, Alberto, Machiaveli, Ercole, Giulia dhe Luka, personazhe të filmit të njohur për fëmijë Luka i cili këtë vit u përzgjodh si temë për mesazhet që mbart në Lojërat Verore. Në fund skuadra e Ercole fitoi dy kupat, Kupën e Rinisë dhe të Lojërave Verore. Në natën finale të gjitha ekipet shfaqën performancat e tyre artistike duke përcjellë edhe disa mesazhe. Don Giuseppe Liano famullitar i Kishës Don Bosko në Shkodër tha se këto katër javë me fëmijët e qytetit ishin një përjetim i bukur.Don Liano tregon edhe mesazhin e Lojërave Verore 2022 që bëri bashkë 825 fëmijë…
Lojërat Verore në Oratorin “Don Bosko” në Shkodër janë kthyer tashmë në një traditë prej 23 vitesh me radhë duke mbledhur fëmijët e qytetit për t’i larguar nga rutina e përditshme dhe fenomenet negative. Lojërat, sportet, historitë, mesazhet sensibilizuese, miqësitë mes fëmijëve dhe të rriturve dhe paqja për botën përmbyllën këto katër javë në Oratorin “Don Bosko”.