TË GJITHË DUHET TË DORËZOJNË LIBRAZAT PËR VERIFIKIMIN E GABIMEVE. Operatori i Shpërndarjes së Energjisë Elektrike ka qetësuar gjithë abonentët familjarë se nuk do të ndërpritet energjia elektrike nëse në sistemin e pagesës ata figurojnë debitorë, por këta i kanë paguar faturat.
OSHEE thotë se të gjithë abonentët që pretendojnë se kanë kryer likujdimin e faturës së energjisë elektrike, por që në sistemin e pagesës figurojnë debitorë, të paraqesin pranë qendrave të Kujdesit ndaj Klientit dokumentacionin e nevojshëm që provon këtë fakt: librezën e vulosur dhe me firmë, mandat arkëtimin, kuponin tatimor. Sipas OSHEE, nëse abonenti i ka dokumentet e kërkuara që ka kryer pagesën, pavarësisht se ajo nuk ndodhet e reflektuar në sistem, ndaj tij nuk merret asnjë masë dhe gjendja e tij debitore fshihet nga sistemi. “Asnjë abonenti nuk i është kërkuar dhe as nuk i kërkohet që të paguajë dy herë për fatura që pretendon se janë të likujduara më pare. Kompania po merr masa për zgjerimin e qendrave të Kujdesit ndaj Klientit, duke hapur rreth 28 pika të reja, me orare të zgjatura, edhe në fundjave, në shërbim të abonentëve”, theksohet në një deklaratë të OSHEE.
