Ka nisur seanca e dytë e Kuvendit për ditën e sotme, ku do të zgjidhet kryetar i Parlamentit, Gramoz Ruçi.
Paraditen e sotme u zhvillua seanca e parë e parlamentit të ri, e cila u drejtua nga Besnik Bare, si deputeti më i vjetër. Ndërsa pas verifikimit të mandatave të deputetëve nga Komisioni do të bëhet votimi për Ruçin.
Ish-kreu i grupit parlamentar socialist, Gramoz Ruçi është kandidat i vetëm i propozuar nga PS dhe nuk pritet që të ketë surpriza, pasi socialistët i kanë votat. Ai ka mbështetjen e të gjithë deputetëve të PS, ndërsa PD dhe LSI, si opozitat e Kuvendit të ri, kanë paralajmëruar votën kundër. Deputetët e PD dhe përfaqësues nga shtresa e ish të përndjekurve do të protestojnë kundër zgjedhjes së Gramoz Ruçit në krye të Kuvendit.
Opozita dhe të përndjekurit e akuzojnë Ruçin si eksponent të ish-diktaturës komuniste dhe për këtë arsye, argumentojnë ata, ai nuk duhet të zgjidhet në foltoren e numrit një të Kuvendit.