Klubi Vllaznia është gjobitur me 2 milion lekë të vjetër nga Komisioni i Disiplinës në Federaten Shqiptare të Futbollit. Kjo gjobë për klubin Vllaznia ka ardhur për shkak të pranisë së tifozëve në ndeshjen Vllaznia-Partizani e zhvilluar së fundmi që kuqeblutë e fituan me rezultatin 1-0.
Pas golit në minutën e 87 nga Dilaver u kërkua nxjerrja jashtë e tifozëve që ndodheshin në tribunën qendrore ndërsa pas ndeshjes drejtori i Partizanit Olsi Rama e ngriti këtë problematike duke thënë se nuk është Fair Play sepse Vllaznia luajti me tifozë dhe se sipas tij prania e tifozëve ndikoi.
Kjo deklarate solli reagime të shumta nga të dy kampet dhe tashmë Komisioni i Disiplinës vendosi ta gjobisë Vllaznine për praninë e tifozëve duke qenë se nuk lejohet dhe se ndeshjet duhet të luhen pa tifozë.
Komisioni i Disiplinës shkruan se “KF Vllaznia për dështimin në përmbushjen e përgjegjësive duke mos respektuar Protokolli Sanitar të FSHF-së dhe Urdhrin e ministrit të Shëndetësisë për “ndalimin e grumbullimeve në vende të mbyllura apo të hapura”, dënohet me gjobë në masën dyqind mije lekë (dy milion lekë të vjetër)”.
