Lëvizja Vetëvendosje ka reaguar ashpër në lidhje me ndalimin e Ramush Haradinaj në Francë.
Në një deklaratë të tij kryetari i Vetëvendosjes Visar Ymeri shprehet se shtetet që nuk e kanë njohur ende Kosovën nuk duhet të ndjekin politikën e Serbisë. Sipas Ymerit ndalimi i Haradinaj në Francë tregon qartë se kush po bëhet pengesë e bisedimeve.
Reagimi i plotë
Arrestimi i Ramush Haradinajt me fletarrest të lëshuar nga Serbia është i papranueshëm! Ne e dimë që Serbia nuk është pajtuar me luftën tonë çlirimtare, por shtetet që na e kanë njohur shtetin (prandaj edhe vërtetësinë e luftës) nuk duhet ta ndjekin politikën e saj përndjekëse. Ky rast tregon edhe një herë që për të pasur normalizim marrëdhëniesh, është Serbia që duhet të ndryshojë, dhe jo Kosova siç po kërkohet. Kërkojmë urgjentisht lirimin e z.Haradinajt, por edhe ndërmarrjen e masave kushtëzuese nga ana e intitucioneve tona deri në heqjen e të gjitha arresteve ndërkombëtare që kanë për qëllim përndjekjen e ish luftëtarëve të UÇK-së. Është e qartë që përkledhja e Serbisë po e bën atë më të keqe. Dialogu me të, tregtia me të, koncesionet ndaj saj, paratë që po ia japim, po e forcojnë armikun tonë, Serbinë, për t’ia bërë më të fuqishme goditjen ndaj nesh. Këto duhen ndalur urgjentisht.
