Një burrë 53 vjeç ka vrarë me armë zjarri ish-bashkëshorten e tij në zonën e njohur si “Xhamlliku” në Tiranë.
Viktimë ka mbetur gjyqtarja e Gjykatës së Shkodrës, Fildez Kasemi (Hafizi) 39 vjeçe, e cila është qëlluar për vdekje nga ish-bashkëshorti brenda makinës së saj. Mësohet se viktima ndodhej në një makinë tip Benz C Clas ngjyrë gri, të parkuar në rrugë. Bëhet e ditur se viktima ka debatuar ashpër me autorin dhe më tej është drejtuar për nga makina për t’u larguar, por ish-bashkëshorti e ka qëlluar dy herë me armë, duke e lënë të vdekur në vend. Shërbimet e policisë kanë bërë të mundur arrestimin në flagrancë të shtetasit Fadil Kasemi 53 vjeç, pak momente pas ngjarjes. Por Kasemi ka tentuar edhe dy vite më parë të vrasë ish bashkëshorten, në plazhin e Golemit, ngjarje e ndodhur në sy të dy fëmijëve të mitur të çiftit. Në cilësinë e provës materiale është sekuestruar arma e krimit. Sakaq grupi hetimor po punon për zbardhjen e motiveve të ngjarjes, ndërkohë që materialet iu referuan Prokurorisë së Tiranës për ndjekje të mëtejshme.
