Pas takimit me Kryeministrit Rama paraditen e sotme, ministri i Shtetit për Çështjet Evropiane, në Ministrinë e Jashtme gjermane Michael Roth është pritur edhe nga ministri Xhafaj.
Ministri i Brendshëm e konsideroi fat për vendin, që ka një avokat të tillë në rrugën evropiane. Xhafaj e konsideroi me rëndësi mbështetjen e vendeve anëtare për hapjen e negociatave, si një mundësi jo për qeverinë dhe mazhorancën,
por si shans për shqiptarët që besojnë në ëndrrën evropiane. Z.Xhafaj tha se çelja e negociatave do të përshpejtonte ritmin e reformave të ndërmarra.
Ministri i Shtetit z.Roth konfirmoi se vizita në Tiranë e bën më të qartë rëndësinë që i kushton Gjermania, integrimit të Shqipërisë në Evropë. Sipas tij, të gjitha reformat e nisura po japin tashmë frytet.
Xhafaj e njohu ministrin gjerman me disa nga detajet e reformës në drejtësi dhe rëndësinë për proceset integruese, duke veçuar faktin se ajo tashmë është një model edhe për vendet e rajonit.
Ai prezantoi Dokumentin e Prioriteteve të MB-së në fushën e rendit dhe sigurisë dhe evidentoi kontributin e ekspertëve gjermanë në hartimin e tij.
Gjithashtu u ndal tek rezultatet e punës së Policisë dhe agjencive ligj zbatuese në luftën kundër krimit të organizuar, operacionin “Forca e Ligjit”, operacionin ndërkombëtar “Anti-skifter”, si dhe masat kundër kultivimit të kanabisit.
Në përgjigje të interesit të ministrit Roth, z.Xhafaj shpjegoi hapat dhe ecurinë e procesit të Vetting-ut në Polici, projektin e Policimit në Komunitet, si dhe masat për uljen e fenomenit të azil kërkimit që kanë dhënë rezultate të dukshme që nga vjeshta e vitit të kaluar.
