Fenomeni i rrëshqitjes së gurëve në rrugën Lezhë-Shëngjin sapo ka nisur, por ndërhyrjet po vonojnë.
Reshjet dhe mungesa e pemëve mund të nxisin shkëputje të shumë gurëve.Është verë dhe në rrugën Lezhë – Shëngjin ka fluks. Por këtu në zonën e Knallës, ku dhe u shfaq fenomeni i rrëshqitjes nuk ka asnjë element mbrojtës.
Rrjetat që do të pengonin rënien e tyre mungojnë. Këto shtylla tregojnë se ky segment duhej të sigurohej.
Firma murembajtëse vetëm sa ka pastruar rrugën nga gurët e vegjël që rane disa ditë më parë. Ato goditën një autobus në të cilin po udhëtonin vajza e gra.
Nuk pati asnjë reagim zyrtar në lidhje me ngjarjen apo përcaktimin e situatës në vijim. E gjitha u la në harresë, kurse emergjencat civile në prefekturën e Lezhës thonë se kanë raportuar dhe presin të ndërhyhet.
Ky gur qëndron në të njëjtin drejtim, ku pati edhe më parë rrëshqitje. Gjysma e tij është në ajër.
Edhe kjo fasadë me gurë gëlqeror është në shpërbërje duke e bërë situatën akoma më alarmante. Por këtu nuk gjendet kush, as Autoriteti Rrugor Shqiptar, as firma mirëmbajtëse apo emergjencat civile.
