Kupa e Shqipërisë në basketboll për meshkuj do të zhvillohet në qytetin e Shkodrës.
Ky është vendimi më i fundit i federatës shqiptare të basketbollit. Natyrisht që zhvillimi i kupës në Shkodër është një lajm i mirë jo vetëm për Vllazninë por edhe për tifozët e saj të shumtë të cilët e kanë mbështetur masivisht këtë ekip vitet e fundit. Kupa e Shqipërisë do të zhvillohet në datat 17-18 shkurt në pallatin e sportit “Qazim Dervishi” në qytetin e Shkodrës. Në këtë mirë ndeshjen e parë Vllaznia do ta ketë përballë ekipit të Tiranës me 17 shkurt në ora 19:00. Në të njëjtën ditë Kamza Basket dhe Partizani do të luajnë ndeshjen tjetër gjysmëfinale në orën 17:00. Një ditë më pas me 18 shkurt dy fitueset e këtyre çifteve në sfidat gjysmëfinale do të luajnë në finale në orën 18:00. Natyrisht që zhvillimi i Kupës së Shqipërisë në basketbollin e meshkujve në qytetin e Shkodrës i jep të tjera ngjyra këtij kompeticioni të rëndësishëm dhe pritet që të kthehet në një festë të vërtetë për vetë publikun e zjarrtë që ndjek Vllazninë dhe mbush pallatin e sportit. Natyrisht që ashtu siç edhe kanë deklaruar drejtuesit e Vllaznisë kërkojnë këtë sezon që të fitojnë gjithçka. Përveç pretendimeve për fitimin e titullit kampion, Vllaznia kërkon që të ketë të sajën edhe Kupën e Shqipërisë dhe Superkupën. Shkodranët për të arritur fitimin e trofeve kanë bërë disa përforcime të rëndësishme duke sjellë ne ekip amerikanin Corey Allen dhe basketbollistin Algert Gjonaj që më parë ishte pjesë e Tiranës. Për Gjonaj gjysmëfinalja e Kupës do të ketë një emocion më shumë sepse do të luaj përballë ish-ekipit të tij. Gjithsesi fillimisht Vllaznia është e përqendruar dhe po përgatitet për ndeshjen gjysmëfinale ndaj Tiranës e më pas do mendojë edhe për sfidën finale që duket më lehtë përballë Kamza Basket apo Partizanit.
