Legjislatura e IX solli pas vitesh mungesë në seancë, kryetarin e Partisë Demokratike, Lulzim Bashën, i cili u ul në ndenjëse që në legjislaturën e shkuar e mbante Eduard Halimi ndërsa ish kryetari i, Sali Berisha nuk e ndryshoi vendin e tij.
Prezencën e Bashës sot në parlament e përgëzoi edhe Sali Berisha, duke e cilësuar si aksident mospjesëmarrjen e tij në legjislaturën e kaluar. Dhe përmes një reagimi në facebook vjen dhe ironia e Astrit Patozit, ish deputetit demokrat.
Sot mësova me habi se mungesa e Lulzim Bashës në parlamentin e 4 viteve të shkuara paska qenë gabim. Zakonisht në raste të tilla kërkohet falje, por ky nuk është ndonjë zakon që pëlqehet shumë në Shqipëri.
Por nëse ishte vërtet kështu, kujt duhet t’ia dimë për nder që na e bëri këtë gjëmë, njeriut apo Zotit? Atij vetë, që vajti e u “internua” si kryetar i Bashkisë së Tiranës, atyre që e propozuan, atyre që e mbështetën dhe e votuan si të tillë, apo kundërshtarëve që nuk ndryshuan rregullat, kur erdhën në pushtet? Sepse, me sa po thuhet, parlamenti shqiptar nuk mund t’u kuptoka kurrë pa Lulzim Bashën.
Dhe Shqipëria e paska vuajtur shumë mosqenien e tij. Por ja që, si gjithmonë, Zoti vonon, por nuk harron. Tani Lulzim Basha është rikthyer, gabimi është ndrequr më në fund dhe Shqipëria thjesht duhet të falenderojë krijuesin dhe duhet të presë frutet e shpejta të kësaj mrekullie.
