Autoritetet greke kanë arritur të godasin një grup të trafikut të drogës në linjën Shqipëri-Greqi-Turqi, ku në Orestiada është ndalur një mjet brenda të cilit janë gjetur dhe sekuestruar 72 kilogramë dhe 173 gramë marijuanë.
Mësohet se droga do të kalohej në Turqi përmes pikës së kalimit kufitar Kastaneon, ndërsa janë arrestuar 3 shqiptarë 24, 33 dhe 46 vjeç, si dhe një grek 34-vjeçar. Policia ka shpallur në kërkim dhe një tjetër grek, një 22-vjeçar.
Gjatë operacionit atyre u janë gjetur dhe sekuestruar 10 celularë, 975 euro dhe 600 lek.
Ndërkohë në një tjetër operacion, janë arrestuar edhe dy shqiptarë të tjerë, të cilët nuk i janë përgjigjur thirrjes së policisë për të ndaluar.
Gjatë arrestimit të tyre u është gjetur një pako e madhe me 11 kg dhe 700 gramë marijuanë. Të arrestuarit janë të moshës 31 dhe 39 vjeç, ndërsa identiteti i tyre nuk bëhet i ditur.
Policia greke bën me dije se prej fillimit të vitit e dri më sot në Igumenicë, Korfuz, Lefkadha, Kefalonia, Janinë, Athinë, Selanik, Artë, Aitiloakarinia, Patra, Kostur, Grevena, Follorinë, Aleksandroupoli, etj., janë sekuestruar 11.3 tonë marijuanë që vinte nga Shqiëria.
