Llalla-vartësve: Mos u trembni nga reforma, luftoni kanabisin.’Bashkëpunim me policinë kundër drogës’
Kryeprokurori Adriatik Llalla ka kërkuar sot nga vartësit e tij që të mos i druhen reformës në drejtësi, por të vijojnë punën në luftën pa kompromis, siç e quajti ai, ndaj kultivuesve të kanabisit dhe trafikut të drogës. Gjatë një takimi të zhvilluar sot me prokurorë nga rrethet, i pari i këtij lloji pas hyrjes në fuqi të ndryshimeve kushtetuese për reformën në drejtësi, Llalla ka dhënë porosi për vartësit e tij, që të vijojnë punën të pashqetësuar nga efektet që do të japë reforma në organizimin e Prokurorisë. Mësohet se Llalla ka kërkuar posaçërisht intensifikim të luftës kundër kultivimit të kanabisit, ndërsa ka kërkuar bashkëpunim intensiv me Policinë e Shtetit. “Duhet të intensifikoni punën në luftën kundër krimit, korrupsionit dhe drogës. Nuk duhet të ketë neglizhencë dhe ulje të cilësisë së punës dhe pse ka nisur zbatimi i reformës. Duhet të bashkëpunoni me policinë dhe çdo institucion ligjzbatues për luftën ndaj kanabisit. Puna juaj nuk duhet të ndikohet nga asnjë shkak”, mësohet të jetë shprehur Llalla gjatë këtij takimi.
