Kjo është një nga rrugët më problematike në Malësinë e Madhe e cila ka pësuar dëmtime të shumta, shkarje të tokës dhe ngushtime në pika të ndryshme. Rruga është në gjendje skandaloze,ndërsa në mot me shi ajo bëhet gati e pakalueshme .
Banorët e fshatit Palvar nuk kane dëshirë që të prononcohen ndonëse përballen cdo ditë me këtë problem. Ata u shprehen jashtë kameras se e kanë ngritur zërin disa herë por kërkesat e tyre nuk janë marrë parasysh, ndaj kanë zgjedhur si armën më të mirë heshtjen. Kjo është një rrugë shumë e rëndësishme për komunitetin që jeton atje për faktin se lidhet me disa lagje e aq më tepër shkurton distancën me autostradën e Hanit të Hotit.
E gjithë gjatësia e rrugës është e dëmtuar duke e bërë pothuajse të pamundur kalimin nga mjetet motorike. Një situatë kjo e përsëritur vit pas viti dhe që nuk po gjen zgjidhje pavarësisht shqetësimit të ngritur nga ana e banorëve.Rruga e Palvarit sikundër edhe rrugë të tjera është lënë në harresë të plotë. Edhe pse një rrugë me dëndësi të lartë banorësh ai segment në këto 30 vite është amortizuar plotësisht.