Transferta e nesërme me kurbinasit do të jetë e veçantë për kapitenin aktual të Vllaznisë, Ndriçim Shtubina.
Ai pritet të jetë në fushë si titullar dhe sapo të prekë tapetin e gjelbërt të stadiumit të Laçit do të regjistrojë ndeshjen nr.200 në kampionat me ekipin shkodran. Por numri 10 i kuqebluve, në këtë takim do të kërkojë të arrijë edhe një tjetër shifër jubilare: të shënojë golin e 30-të në kampionat. E kemi fjalën vetëm për Vllazninë, sepse në karrierën e tij ka luajtur edhe 14 ndeshje me Skënderbeun dhe ka shënuar një gol, në sezonin 2007-2008. Po ashtu, ka luajtur edhe 20 ndeshje dhe ka shënuar 1 gol me Flamurtarin, në sezonin 2011-2012. Sa i takon numrit të ndeshjeve të luajtura, sigurisht që ai mund të shkojë edhe më përpara, sepse sapo i ka mbushur të 29-tat. Kuptohet që shënimi i golit të 30-të do t’i dhuronte më shumë emocione, sepse do të hynte në listën e 20 lojtarëve që kanë shënuar më shumë në historinë e Vllaznisë, listë kjo që, siç dihet, kryesohet nga Vioresin Sinani, me 168 gola të shënuar. Shtubina aktualisht ka të njëjtën kuotë golash me emra të tillë si Fasli Fakja e Halil Puka, ndërsa me një gol më shumë është Hamdi Salihi. Jo më kot, ai tashmë ka një dëshirë të madhe për ta shënuar që nesër këtë gol të shumëpritur.
