Presidentja e Kosovës, Vjosa Osmani ka reaguar për herë të parë sa i takon vizitës së Kurtit në Tetovë, që ka ndezur një sërë reagimesh. Keqkuptim e ka cilësuar vizitën e kryeministrit të Kosovës Albin Kurti në Tetovë presidentja Vjosa Osmani. Sipas saj, shfaqja e flamurit të “Shqipërisë etnike” në mesin e përkrahësve të Kurtit në Tetovë është thjesht lëvizje e një qytetari dhe jo diçka e organizuar. Osmani gjatë vizitës në Komunë e Dragashit tha se Maqedonia e Veriut është një prej fqinjëve më të çmuar të Kosovës.
“Kjo besoj që është një keqkuptim i vogël, që kur kemi vullnet të dyja palët, siç e kemi dëshmuar gjithnjë, tejkalohet, duke e ditur që të gjitha institucionet e Kosovës janë të interesuara vetëm për marrëdhënie pozitive gjithnjë në rritje me Maqedoninë e Veriut.”- tha Presidentja.
Faktorët politikë maqedonas po e shohin si nacionaliste paraqitjen e Kurtit, gjatë fjalimit të të cilit, para mijëra përkrahësve në Tetovë, ku shfaqej publikisht një flamur i “Shqipërisë etnike”. Nga ana tjetër, Kryeministri i Maqedonisë së Veriut, Dimitar Kovacevski ka votuar “pro” rrugës “Adem Demaçi”, në Çair.
