Nga operacioni i nisur para disa ditësh, i njoftuar të premten, 27 shtator 2019, janë vënë në pranga Adrian Bega, punonjës sigurie në portin e Durrësit, dhe Altin Myslihaka, ndërkohë është shpallur në kërkim Gentian Malindi.
Kanë qenë autoritetet e shtetit fqinj dhe DEA amerikane, të cilët kanë sinjalizuar policinë shqiptare, duke i kërkuar të verifikojnë kontenierët që ishin nisur për në Durrës. Pas kontrollit të imtësishëm në port u faktuan dyshimet e autoriteteve greke, pasi në dyshemetë kontenierëve kishte kokainë.
Për të rënë në gjurmët e trafikantëve, policia greke zëvendësoi kokainën me oriz në të cilën vendosën GPS për të qenë në ndjekje të lokacionit të personave që mund të merrnin lëndën narkotike. Të vetmit që u paraqitën në Portin e Durrësit ishin dy personat tashmë të arrestuar, të cilët janë punonjës të sigurisë në Portin e Durrësit.
Duke shfrytëzuar këtë fakt, ata kanë hyrë lehtësisht tek kontenierët duke përdorur kartën e punës. Sipas dëshmisë së marrë një prej të arrestuarve bëhet e ditur se kanë hyrë në port nga ana e Urës së Dajlanit dhe kanë mundur të marrin disa nga pakot me drogë, dhe më pas janë larguar me një automjet me targa franceze. Më pas ata kanë vijuar rrugën drejt Shkëmbit të Kavajës, kur gjatë ecjes kanë kuptuar se diçka nuk shkonte.
Ishte pikërisht Gentian Malindi që kuptoi se në pakot e kokainës kishte edhe oriz, i cili më pas ka pikasur një automjet që po i ndiqte. Trafikantët e dyshuar kanë hedhur drogën jashtë automjetit ndërsa i vetmi që ka mundur të arratiset është shtetasi Malindi.
Ndërkohë sot Altin Mislihaka, 35-vjeç, një prej të arrestuarve doli para Gjykatës së Krimeve të Rënda nga ku u njoh me masën e sigurisë arrest me burg deri në përfundim të hetimeve. Për shtetasin tjetër të arrestuar Adrian Bega, krimet e rënda pritet të caktojnë masën e sigurisë në një moment tjetër.
Shtetasi i shpallur në kërkim Gentian Malindi ka qenë edhe më herët i arrestuar dhe proceduar për drogë, pasi në qershor të vitit 2013, është ndaluar në një furgon mallrash në të cilin u gjet nga policia 500 kilogramë kanabis. Lënda narkotike vinte nga Lazarati ndërsa arrestimi i tij u bë në kuadër të operacionit të “Sfida”.
Gentian Malindi është i shpallur në kërkim për 137 kg kokainë të kapur në dy kontenierë në Durrës.
Malindi është një person i njohur nga autoritetet shqiptare, pasi ai është arrestuar në vitin 2013 në lidhje me kapjen e një sasie prej 500 kg kanabis sativa.
Në atë kohë gjykata e la të lirë, pasi një person tjetër mori përgjegjësinë për këtë sasi droge.
Avokati Ilir Malindi, i cili është edhe babai i Gentian Malindit tha se ai nuk ka lidhje me kokainën e kapur në Durrës.
Ilir Malindi: Djali im nuk ka lidhje me lëndën narkotike të sekuestruar. Ai është shpallur në kërkim pasi një prej të arrestuarve ka përmendur emrin e tij si porositës. Gentian Malidni nuk do të dorëzohet derisa çështja të marrë zgjidhje ligjore.
Ndërkohë policia ka arrestuar dy persona, Altin Myslihaka 35 vjeç dhe Ardian Bega 53 vjeç si të dyshuar në lidhje me kokainën në Durrës.
Dy të arrestuarit së bashku me Gentian Malindin ishin pritësit e sasisë prej 137 kg kokainë, e cila vinte nga Ekuadori dhe nëpërmjet Greqisë kishte mbërritur në Shqipëri.
