Riatdhesimi i shqiptarëve, Çako: Azili në BE i pamundur
Zëvendësministri i Brendshëm, Stefan Çipa së bashku me Drejtorin e Policisë së Shtetit, Haki Çako, kanë qenë mesditën e sotme në aeroportin e Rinasit, ku janë riatdhesuar nga Franca, 30 shtetas shqiptar. Si zv.ministri Çipa ashtu edhe kreu i policisë janë shprehur se azili në vendet e Bashkimit Evropian është i pamundur. “Vazhdojmë në mënyrë intensive bashkëpunimin me të gjithë partnerët dhe vendet e Bashkimit Evropian, të cilat e kanë bërë të qartë se azili në vendet e BE-së është i pamundur”, është shprehur Drejtori i Përgjithshëm i Policisë së Shtetit Haki Çako. Çako gjithashtu ka shtuar se të gjithë shtetasit shqiptar që kanë kërkuar azil në vendet e BE-së janë të detyruar të kthehen në Shqipëri, duke krijuar kështu një kosto shtesë për veten e familjen e tyre, si dhe për të gjithë shqiptarët të cilët presin anëtarësimin e vendit në BE. “Policia do të vazhdojë të hetojë të gjitha agjencitë dhe grupet të cilat udhëzojnë shtetasit shqiptar për azil në BE”, tha Çako, i cili shtoi se shumë vende të unionit ofrojnë mundësi reale për punësim, por azili nuk është mënyra e duhur. Ditën e sotme numri i personave të riatdhesuar është 30 persona, ndërkohë që Çako ka bërë të ditur se ka edhe në vende të tjera shtetas shqiptar që do të riatdhesohen.
