Shqiptarët bëhen heronj, shpëtojnë foshnjën nga vdekja
Dy shqiptarë bëhen “engjëj shpëtimtarë”, duke rrezikuar jetët e tyre për të shpëtuar një jetë të njeriut tjetër. Senat Iseni, nga Shkupi punon si shef në një kiosk pjekurinash në Stacionin Hekurudhor Stadelhofen të Zyrihut (Zvicër). Paraditen e djeshme, ai ka dëgjuar një zë të thershëm nga binarët aty afër. “Kur dola, pashë një karrocë fëmijësh mbi binarë, e në të ishte një foshnjë katërmuajshe”, citohet ai nga blick.ch. Në të njëjtën kohë, aty pranë qëllon edhe shqiptari tjetër, Fatmir Bardh Haziri. Ai ka po këtë rrëfim për albinfo.ch. Iseni nuk ngurron asnjë sekondë dhe vrapon së bashku me dy punëtorë të tij drejt shinave. “Kanë qenë gjithsej 8 persona që kanë vrapuar për të ndihmuar. Jam befasuar me guximin qytetar të treguar”. Në veçanti atij i ka lënë përshtypje një ish kontrollues biletash i cili ka reaguar fuqimisht. albinfo.ch merr vesh se bëhet fjalë për shqiptarin tjetër, Fatmir Bardh Hazirin nga Gjilani. I kontaktuar nga albinfo, Fatmiri e vërteton rrjedhën e ngjarjes. “Unë kam zbritur poshtë te binarët e pastaj më është bashkuar edhe nëna e foshnjës”, thotë Fatmiri. Ata kanë ngritur së bashku karrocën. Unë kam qëndruar lart në kënd dhe e kam tërhequr karrocën”, thotë Senati. Nuk kalon asnjë minut derisa një tren kalon mbi binarët ku ishte karroca. Aty kishte ngelur një mbulesë e foshnjës. Vet foshnja ka shpëtuar pa u lënduar. Senat Iseni është i njohur edhe për raste tjera shpëtimi. Brenda dhjetë viteve sa punon këtu ai ka shpëtuar në tri raste jetë njerëzish. Në vitin 2014 Senati ka qenë në rrethin e ngushtë për të fituar çmimin “Prix Courage”, që jepet në nivel të Zvicrës për personat që kanë treguar guxim qytetar.
