Kjo është dhoma e repartit të pneumologjisë në spitalin rajonal të Shkodrës e cila u përfshi nga flakët në orët e para të mëngjesit të 22 prillit.
Ka qenë ora 6:45 e mëngjesit kur dhoma e një pacienti në repartin e pneumologjisë në katin e katërt të spitalit të Shkodrës u dogj nga një zjarr i rënë. Në njoftimin e tij spitali rajonal i Shkodrës bën me dije se menjëherë pacientët që ndodheshin brenda dhomës janë evakuar në kohë duke mos pësuar lëndime. Pas zjarrit të rënë në vendngjarje kanë mbërritur forcat e repartit zjarrëfikës të Shkodrës duke bërë të mundur shuarjen e flakëve. Ndërhyrja në kohë ka bërë që zjarri të mos përhapet në dhomat e tjera të spitalit.
Ndërkohë nga zjarri i rënë janë shkaktuar vetëm dëme materiale tek kjo dhomë e pacientëve. Nga ana tjetër burimet bëjnë me dije se kjo ngjarje ka ndodhur në mënyrë aksidentale. Një pacient brenda dhomës ka qenë duke përdorur një bombol gazi për nevojat e tij personale dhe papritur flakët kanë nisur të përhapen brenda dhomës. Pacienti dhe personat e tjerë që ndodheshin aty kanë arritur që të dalin me shpejtësi.
Pas shuarjes së flakëve nga zjarrëfikëset, spitali rajonal i Shkodrës siguron se shërbimi vijon pa ndërprerje dhe se po merren masa të menjëhershme për riparimin e mjedisit ku ka rënë zjarri. Në vendngjarje mbërritën edhe shërbimet e policisë në ndihmë të forcave zjarrëfikëse. Ndërkohë grupi hetimor vijon punën për të bërë të mundur zbardhjen e plotë të zjarrit që përfshiu dhomën në repartin e pneumologjisë në spitalin e Shkodrës. Ajo dhomë që u dogj për momentin ndodhet e mbyllur deri në momentin që të kryhen gjitha veprimet si dhe të riparohet pas dëmeve të shkaktuara.
