Mesnata e së premtes shënoi fundin e fushatës dhe fillimin e 24 orëve të heshtjes zgjedhore.
Partitë politike në bazë të ligjit e kanë të ndalur fushatën, ndërsa puna kryesore është përqendruar në KZAZ. Komisionet e Zonave të Administrimit Zgjedhor kanë bërë gati dokumentacionin dhe bazën e nevojshme materiale për t’i shpërndarë në qendrat e votimit. Në KZAZ-në NR.5, e pozicionuar në palestrën e shkollës 9-vjeçare “Ismail Qemali”, 2 partitë e mëdha PD e PS akoma nuk kanë dërguar emrat e komisionerëve të qendrave të votimit.
Kjo KZAZ mbulon rajonin nr.5 në qytet si dhe një pjesë të rajoneve 3 e 4. Nënkryetari i KZAZ-së nr.5 i tha Star Plus se komisioni ka bërë gati bazën materiale, por akoma nuk janë paraqitur propozimet për komisionerët e qendrave të votimit. Po ashtu, kutitet e votimit dhe materialet e tjera zgjedhore nuk kanë filluar akoma të shpërndahen as në zona të tjera të qytetit.
Në KZAZ-të nr 2, 3 dhe 4 materialet zgjedhore dhe kutitë e votimit janë gati. Ajo që pritet është mbërritja e emrave të komisionerëve të qendrave të votimit për të dërguar më pas bazën materiale.Propozimi i emrave të komisionerëve të qendrave të votimit vijon të zvarritet nga subjektet politike, ku qarqet që më së shumti kanë shfaqur vonesa janë Shkodra dhe Lezha.
Afati i fundit për marrjen në dorëzim të bazës materiale dhe mbërritjen e tyre në qendrat e votimit është mesnata e së shtunës. Në qarkun e Shkodrës me 11 mandate deputetësh janë gjithsej rreth 263 800 persona me të drejtë vote.