Ky afat i dhënë nga kryebashkiaku Tonin Marinaj për përfundimin e projektit të ashtuquajtur Rilindja Urbane në Koplik përkonte me muajin e mbajtjes së zgjedhjeve parlamentare.
Por ndërkohë projekti 2 mln dollarësh për rikonstruktimin e qendrës së Malësisë së Madhe është ende larg përfundimit. Edhe pse projekti është vlerësuar pozitivisht nga qytetarët, prej 2 muajsh lëvizja me automjet në hyrje-daljet e qytetit është sfidë për shoferët. Ndërkohë, ditët e fundit është bllokuar në dy anë hyrja në Koplik.
Aksi që lidh qytetin me Njësinë Administrative Kastrat qëndron i bllokuar totalisht, ndërsa rruga tjetër që e lidh me njësinë administrative Shkrel hapet në orare të caktuara.
Menaxhimi i gjithë fluksit të automjeteve, bëhet vetëm nga dy policië të bashkisë Malësi e Madhe. Ndërkohë, stacioni i furgonëve të transportit urban është zhvendosur në mes të rrugës disa metra larg godinës së bashkisë. Rrugët kryesore në hyrje-dalje të qytetit qëndrojnë të bllokuara edhe gjatë natës, ndërsa ritmet e punimeve që zhvillohen aktualisht tregojnë për shkelje të mëtejshme të afatit përfundimtar.
