Policia e shtetit ka ndërmarrë tashmë një plan të mirëfilltë masash për parandalimin dhe sekuestrimin e kapsollave dhe lëndëve piroteknike me rrezikshmëri për jetën e qytetarëve.
Ministri i Brendshëm Sandër Lleshaj nxori një urdhër për moslejimin e tregtimit të kapsollave në asnjë prej dyqaneve në të gjithë vendin.
Ky vendim erdhi nisur nga ngjarja e para pak ditëve ku gjatë një proteste para Parlamentit, mbeti e plagosur nga një kapsollë një punonjëse policie, nga shqetësimet e shumta të qytetarëve që kanë denoncuar në numrin 112 dhe në aplikacionin “Komisariati Dixhital”,
si dhe duke parë rrezikshmërinë e lartë për jetën që kanë këto mjete shpërthyese, Policia e Shtetit prej disa ditësh vijon zbatimin e detyrave të përcaktuara në këtë Plan Masash për kontrollin e tregjeve dhe bizneseve që kryejnë aktivitet në tregtimin e lëndëve piroteknike dhe fishekzjarreve.
Në këtë mënyrë pjesë e kontrolleve dhe lëndëve të sekuestruara si kapsolla, fishekzjarre dhe të tjera është bërë edhe qyteti i Shkodrës. Efektivë policie pas urdhërit kanë zbritur në terren në të gjitha qytetet e Shqipërisë duke bërë kontrolle dhe sekuestrimin e këtyre lëndëve që cilësohen me rrezikshmëri të lartë.
Kështu janë kontrolluar 1136 subjekte (dyqane të ndryshme, markete apo supermarkete) si dhe tregje të shumicës. Si rezultat i kontrolleve janë sekuestruar 643 kapsolla, si dhe 487 fishekzjarre që dyshohet se kanë në përbërje lëndë shpërthyese me rrezikshmëri për jetën.
Policia e Shtetit bën të ditur se janë dërguar materialet për vlerësim në Prokurori për 3 subjekte ku janë gjetur dhe sekuestruar kapsolla. Kontrollet janë përqëndruar edhe në verifikimin e plotësimit të masave shtesë të sigurisë, si kamera dhe fikse zjarri. Policia e Shtetit iu bën thirrje të gjitha bizneseve që të mos tregëtojnë kapsolla apo lëndë piroteknike si dhe të plotësojnë kushtet dhe kriteret për magazinimin dhe tregtimin e lëndëvë piroteknike dhe fishekzjarreve, konform ligjit.
Gjithashtu një thirrje shkon për prindërit që mos të lejojnë fëmijët të përdorin të tilla mjete shpërthyese pasi janë rrezik potencial për jetën e tyre dhe të tjerëve, si dhe ftohen qytetarët për të denoncuar çdo rast të tregëtimit të lëndëvë të mësipërme në numrin pa pagesë 112 apo në aplikacionin “Komisariati Dixhital”.